Ausfahrt 18.08.2019

Dr hütig Sunnitg zeigt sich vor allerbeschte Syte. Sunne pur, kes Wülckli steit am Himmu u Tämperature dürewäg im grüene Bereich. Das heisst, mir sattle üsi Black Beauty, packe ds Picknick y u löh dr Rägeschutz deheime. Hüt  füehrt dr Küsu ds erste Mal a. Aber nid bevor mir z’ersch alli enand gebührend begrüesst hei, dr Dietu und dr Küsu erklärt hei, wos söll düre ga u dr Didu ou die wichtigschte Regle bim Konvoifahre wiederholt het. „The same procedure as every year....!“ Aber nei, nid ganz. D’Donja isch ziemlech ufgregt u voller Vorfreud. Für sie bedütet dä Sunntig z’erschte Mal sälber ihri Harley under s’Füdli z’näh u im Konvoi mit z’fahre. Für’s vorewägg z’näh, si het das meischterhaft gemeischteret. Bravo, Donja!!

Also mir 14 Bikes düse em Küsu nache z’ersch über Fahrni u übere Schallebärg gäge ds Äntlibuech. Kaffihalt isch in Eschholzmatt bir grosse Chiuche. Ir Wirtschaft isch alles scho vorbereitet. D’Gipfeli stöh ufem Tisch u ds Ykassiere isch ou schnäll erledigt. D’Chapterkasse übernimmt dä Schade. Merciii Euch allene !!

Ds Schüpfheim biege mir rächts ab übere Gloubebielerpass. Mir gniesse die schöne Kurve u vor allem die prächtigi Ussicht äne abe uf e Sarnersee. Dür nes Schlychwägli fahre mir de füre uf Sarne u biege links ufe Gloubebüehlpass ab. Es isch mittlewyle Mittag worde, wo mir de uf em grosse Parkplatz bir Wirtschaft üsi Stahlrösser parkiere u dr Proviant uspacke. Di Meischte finde es schattigs Plätzli under deTanne u es wird mit vollem Muul philosophiert, plagiert u dorfet. Es paari gönne sech de no es Käfeli oder es Express, bevor mir über Passhöchi gäge ds Äntlibuech rattere. Verby a prächtige Bluemegärte, feisse Matte, schmatzende Chüeh u Geisse uf em Mischtstock geits wieder zrügg i ds Ämmital. Ds Ämmital wär ja nid ds Ämmital, wes nid no einisch uf ene Hoger ufe gieng. U das uf mängem schmale Strässli wos de zu Stous u zum Teil zu Milimeterarbeit chunnt. Ömu we de dr Puur sys Höifueder usgrächnet ou grad hüt no hurtig muess ga ytue. Im Blapbach gniesse mir es Zvieri mit Glace, Meringue u Nidle. Em Dietu sini „Rautking“ het scho dr ganz Tag chly bocket u hie wott si grad gar nümme brumme. Zum Glück sy mit ja uf emne Hoger u so stosst der Dietu churzerhand die schwäri Maschine ah u dr Motor brummt wieder wie vorhär.

So schlängle mir üs gäge Langenegg (ob’s Unter-, Ober- oder gar Mittellangenegg isch gsy, weiss ig nümme). Dietu getrout sech nümme d’Maschine abzstelle u fahrt de gly einisch Richtig Thun diräkt i Shop. Mir verabschiede üs u jede fahrt de i sy Richtig dervo. 

Nach emene settige Tag wird eim wieder einisch so richtig bewusst, dass es schöner ja niene cha sy !!!

Merci em Küsu, Dietu u allen Sperrer, dass mir unfallfrei u zfride deheime acho sy u de no gmütelch hei chönne es Bierli  gniesse.

Dr Ushilfsschriberling

Brigitte